Այսօր Սարաևոյում կայանալիք Բոսնիա և Հերցեգովինա-Հայաստան դիմակայության առնչությամբ ասուլիս է տվել տանտերերի ընտրանու ավագ, հարձակվող Էդին Ջեկոն, ում համար սա հարյուրերորդն է լինելու հավաքականի կազմում: «Յուրահատուկ՝ հոբելյանական հանդիպում է ինձ համար լինելու, ինձ շատ հարազատ ստադիոնում, որտեղ ես սկսել եմ իմ կարիերան։ Դա հավելյալ շարժառիթ կլինի ինձ համար, որպեսզի ավելի լավ հանդիպում անցկացնեմ։ Հայաստանի ընտրանու դեմ հանդիպումն ինձ համար հիշվող կլինի։ Չեմ ուզում մրցակցից անուններ թվարկել, մենք բավականին լավ ենք ճանաչում մեր մրցակցին։ Մենք պատրաստ ենք այդ խաղին և մեր ցանկությունը միմիայն հաղթանակն է։

Վերջին անգամ մեկ ամիս առաջ եմ գոլի հեղինակ դարձել, սակայն վստահ եմ, որ ընթացիկ ընտրական փուլում կկարողանամ գոլեր խփել։ Շատ լավ կլինի, եթե կարողանամ վաղվա խաղում գոլ խփել։ Հենրիխ Մխիթարյանն ամենահայտնի հայ ֆուտբոլիստ է։ Նա ինձ դուր է գալիս որպես ֆուտբոլիստ, Մխիթարյանը լավ որակներ ունի, բայց քիչ խաղաժամանակ է ստանում «Արսենալում»։ Հուսով եմ, որ վաղվա խաղում նա մեզ համար խնդիրներ չի ստեղծի։ Հույս ունեմ նաև, որ նա կկարողանա խնդիրներ ստեղծել մեր մյուս մրցակիցների համար, քանի որ նա իրոք լավ որակներ ունի»,- Ջեկոյի խոսքն է մեջբերում sportsport.ba-ն։

Հիշեցնենք, որ դիմակայությունն այսօր է, Երևանի ժամանակով 23։45-ին։