Այսօր Ճապոնիայում ավարտվել է գեղասահքի աշխարհի առաջնության կանանց մրցակցությունը: Չնայած նվաճած բրոնզե մեդալին՝ մեր հայրենակցուհի Եվգենյա Մեդվեդևա-Բաբասյանի մրցելույթը պիտի որակել գերազանց, որովհետև այսքան անհաջող սկսված մրցաշարի ավարտին այսպիսի փայլուն մրցելույթ՝ այն էլ հավաքականում վերջին պահին հայտնվելով, բառացիորեն անհավանական բան է: Մեդվեդևան հաստատեց, որ բացառիկ կամային որակների մարզիկ է ու իրավամբ կազմում է կանանց համաշխարհային գեղասահքի էլիտայի անբաժան մասը:

Աշխարհի չեմպիոնի կոչմանն է արժանացել օլիմպիական խաղերի ոսկե մեդալակիր Ալինա Զագիտովան: Ի դեպ՝ սա նրա առաջին մրցանակն էր մեծահասակների աշխարհի առաջնությունում: Հիշեցնենք, որ, ի տարբերություն նրա, Մեդվեդևան աշխարհի կրկնակի չեմպիոն է: Մրցանակային երկրորդ հորիզոնականը բաժին է հասել ղազախ Էլիզաբեթ Տուրսունբաևային, ով դարձավ մեծահասակների աշխարհի առաջնությունում առաջին քառապտույտ ցատկ կատարած մարզուհին:

Հակառակ սպասվածի, ճապոնացի գեղասահորդները չկարողացան մեդալային մրցակցություն ցույց տալ Ռուսաստանի հավաքականին /նրանք հանգրվանել են չորրորդ, հինգերորդ, վեցերորդ հորիզոնականներում/: Ինչ վերաբերում է Ռուսաստանի ընտրանու երրորդ մասնակցին՝ Սոֆյա Սամոդուրովային, Եվրոպայի գործող չեմպիոնը երկու վարժությունների հանրագումարում ցույց է տվել ութերորդ արդյունքը: