Ռուսաստանի պետդումայի պետական շինարարության ու օրենսդրության կոմիտեի նախագահի առաջին տեղակալ Վյաչեսլավ Լիսակովը հանդես է եկել երկրում էլեկտրաէներգիայի գողության համար սահմանված պատիժը խստացնելու առնչությամբ։ Հավասարապես թե բնակչության, թե կազմակերպությունների մակարդակով։

Խոստովանենք՝ Խորհրդային Միությունում պետությունից էլեկտրաէներգիա գողանալը հին ու բարի ավանդույթի պես մի բան էր ու դա չնայած էլեկտրաէներգիայի շան մսի գին ունենալուն։

Պարզ տեղափոխության արդյունքում անկախ Հայաստանի տարիներին երկրում ամեն ինչ արմատապես փոխվեց․ գողը գողից վերածվեց գողացվողի, թալանողի։ Պատահական չէ, որ էլեկտրաէներգիայի ոլորտի աշխատողները դարձան հասարակության բարձր կենսամակարդակ ունեցողներ, իսկ մասնավորապես բնակչությունն այդպես էլ անկարող մնաց պարզելու, ապացուցելու, որ իրեն թալանում են, հավելագրումներ անում։ Դրան մեծապես եկավ նպաստելու և այն, որ հաշվիչները տներից դուրս հանվեցին, տեղափոխվեցին ընդհանուր օգտագործման տարածքներ, ինչն էլ տեսուչներին լիակատար հնարավորություն տվեց ծախսված էլեկտրաէներգիայի ցուցանիշներին վերաբերվել սեփական հայեցողությամբ՝ առավելագույնս օգտվելով նաև այն հանգամանքից, որ ոլորտում գործում է անօրենությունը՝ չկա իրենց վերահսկող կազմակերպություն, հաշվիչների վրա բացակայում են դրոշմակնիքները և այլն, և այլն։

Բնակչությունն այս ամենաթողությանը փորձեց պատասխանել գոտի պնդացնելով, էլեկտրաէներգիան ավելի խնայողաբար օգտագործելով՝ դա զուգորդելով ավելի պակաս ծախսատար տեխնիկա, լամպեր գնալով։ Ու որքան էլ տարօրինակ է, հակառակ բնակչության այս ջանքերին, գործում էր հակառակ էֆեկտը, որովհետև ամեազոր էլեկտրիկը հաշվիչի գրանցած ցուցմունքի հետ ինչպես կամենում, այնպես էլ վարվում էր, իսկ դրան անհնար էր դիմադարձել անիմաստ բողոքներով։ Այո, ոչ մեկի համար էլ գաղտնիք չէ, որ էլեկտրական հաշվիչների գլխին ինչ կապիկություններ են արված, որ դրանք պտտվում են արագացված ռեժիմով կամ էլեկտրիկների քմահաճույքով ու այս խուլիգանության դեմն առնող չկա։

Հասկանալի է, որ երկրում շտկելու, ուղղելու կյանքն օրինական հուն բերելու ծով խնդիրներ կան, սակայն արդյո՞ք աններելիորեն չենք դանդաղում մեր անելիքում, թե՞ հայկական էներգետիկայի գլխին կանգնած են կապույտարյուն մարդիկ, ովքեր օրենքի շրջանակներից դուրս են։