Ազգերի լիգայի կիսաեզրափակչում դառնալով հեթ տրիկի հեղինակ՝ բացի այն, որ Քրիշտիանու Ռոնալդուն հաղթանակ պարգևեց իր երկրի հավաքականին՝ նրան հանելով եզրափակիչ, այլ իր մարզական կարիերայի ընթացքում հերթական նոր բնագիծը նվաճեց։ Բանն այն է, որ սա այս տաղանդավոր ֆուտբոլիստի թվով 53-րդ եռագոլն էր, հավաքականի մակարդակով՝ յոթերորդը։ Ի դեպ՝ այս երեք գոլով ազգայինի կազմում նա իր խփած գոլերի թիվը հասցրեց 88-ի։ Հետաքրքրության համար ասենք, որ հավաքականում երկրորդ բարձր ցուցանիշը պատկանում է Պաուլետային՝ 47 գնդակ։

Նկատենք, որ Քրիշտիանու Ռոնալդուն ազգային հավաքականի կազմում առաջինն է նաև խաղերին ունեցած մասնակցության թվով։ Շվեյցարիայի ընտրանու հետ մրցակցությունը նրա համար 157-րդն էր հավաքականում։ Երկրորդ ցուցանիշն այստեղ լեգենդար Լուիշ Ֆիգուինն է՝ 127 հանդիպում։

Դժվար է երևակայել, որ Ռոնալդուն չի դառնալու նաև հավաքականում գոլ խփած ամենաառաջացած տարիքի ֆուտբոլիստը։ Ներկայումս այս ցուցանիշով առաջինը Ռիկարդու Կարվալյուն է։ Նա իր վերջին գոլը խփել է 2015 թվականին, 36 տարեկան 10-ը ամսական, 11 օրեկան հասակում։ Այս պահի դրությամբ Ռոնալդուն 34 տարեկան չորս ամսական է։ Այնպես որ՝ ժամանակ կա։