ՀՅԴ քաղաքային կոմիտեն հանդես է եկել հայտարարությամբ․ «ՀՅԴ Երևանի քաղաքային կոմիտեն մտահոգ է այս օրերին Երևանի քաղաքապետարանի կողմից իրականացվող գործողությունների կապակցությամբ։

Մենք կողմ ենք քաղաքի կենտրոնում կանաչ տարածքների վերականգմանը, սակայն քաղաքային իշխանությունների թիրախավորված շտապողականությունը և դիվիդենդներ շահելու բացահայտ պոպուլիստական քայլերը՝ կանաչ տարածքների վերականգնման քողի տակ, մեզ անհանգստացնում են։

Գնահատելի կլիներ, եթե քաղաքային իշխանությունները նույն ջանասիրությամբ լծվեին մեր քաղաքի բացահայտորեն ավելի կարևոր խնդիրների լուծմանը, ինչպես օրինակ՝ տրանսպորտային համակարգը, վերելակաշինությունը, աղբահանությունը և այլ առաջնային խնդիրներ։ Հինգ ամիսների ընթացքում իրենց իսկ ծրագրի մեջ նշված դրույթներից և ոչ մեկի իրագործման համար քայլեր չեն արվել։ Ավելին՝ շարունակվում են նախկինից եկած հոռի երևույթները, ինչպես օրինակ Երևանի պատմական տեսքին մաս կազմող շինությունների ոչնչացումը։

Շատ ավելի կենսական է կանաչապատումը սկսել Նորքի անտառներից, քաղաքի ծայրամասերում գտնվող բազմաթիվ զբոսայգիներից, շենքերի բակերից, որոնք ապօրինի կառուցված ավտոտնակներով վերածվել են ավտոկայանատեղիների և դարձել վտանգավոր քաղաքացիների և հատկապես երեխաների համար։

ՀՅԴ Երևանի քաղաքային կոմիտեն պնդում է, որ Երևանի քաղաքային իշխանությունները պարտավոր են ունենալ հստակ մարտավարություն՝ իրենց ցանկացած որոշումից կամ քայլից տուժող Երևանի քաղաքացուն ապահովագրելու համար։ Անընդունելի է հարյուրավոր քաղաքացիների գործազրկությանը նման անլրջությամբ մոտենալը։ Ի դեպ, այդ նույն քաղաքացիների ձայներով են ընտրվել նրանք»: