Ինչպես հայտնի է, հանրապետության նախագահ Արմեն Սարգսյանն այդպես էլ չմասնակցեց Արցախի Հանրապետությունում կայացած Հայաստանի Հանրապետության անվտանգության խորհրդի նիստին։

Հետին թվով խմբագրումներ են արվում չմասնակցելու պատճառների վերաբերմամբ, սույնում հավասարապես ջանում են թե ՀՀ անվտանգության խորհրդի քարտուղարը, թե հանրապետության նախագահի աշխատակազմի հասարակայնության հետ կապերի վարչությունը, սակայն դրանք իրականում անհաջող բացատրություններ են, թեպետ չհրավիրելու լավ էլ օրինական հիմքեր կան՝ ի պաշտոնե ՀՀ նախագահն Անվտանգության խորհրդի անդամ չէ:

Կասեք՝ Անվտանգության խորհրդի անդամ չէ, բայց նիստին մասնակցել է ՀՀ ազգային ժողովի նախագահը, սակայն, կներեք, Արարատ Միրզոյանը վարչապետ Նիկոլ Փաշինյանի ընկերն է ու ավել-պակաս հարցազրույցներով, սեփական դերի գերագնահատումով այս ու այն երկրի լրատվամիջոցներին հո հարցազրույցներ չի՞ տալիս, ինչպես ոմանք: Եվ հետո, եթե նկատել եք, Արմեն Սարգսյանի կինն արտասահմանյան գործուղումներում մշտապես ամուսնու կողքին է լինում, ինչը չի բարեհաճում անել հանրապետության ներսում ամուսնու կողմից գոնե այս վերջին երկու ծաղկադրում-պսակադրումներին:

Մարտին ՀՈւՐԻԽԱՆՅԱՆ