Չեմպիոնների լիգայի մեկ ութերորդի պատասխան խաղում իտալական «Յուվենտուսը» դարձավ փոքրիկ հրաշքի հեղինակ: Շնորհիվ Քրիշտիանու Ռոնալդուի հեթ տրիկի, այն կարողացավ զրոյացնել մադրիդյան մրցամարտում 2:0 հաշվով կրած պարտության դառնությունն ու դուրս գալ քառորդ եզրափակիչ: Սա իսկապես ֆանտաստիկ մրցամարտ էր, ու ակումբի ղեկավարությունը իսկապես կարող է հպարտանալ անցած տրանսֆերային պատուհանում իր ծախսած գումարներով, որոնք տրվեցին պորտուգալացուն ձեռք բերելու համար: Ահա այսպես Ռոնալդուն վարձահատույց եղավ թուրինյան ակումբին: Հատկանշական է, որ պորտուգալացի հարձակվողը Չեմպիոնների լիգայում իր նախորդ հեթ տրիկը ձևակերպել էր 2017 թվականի մայիսի 2-ին այս նույն «Աթլետիկոյի» դեմ խաղում: