Կայացել է Նիկոլ Փաշինյանի և ՀՅԴ խորհրդարանական խմբակցության ղեկավար Արմեն Ռուստամյանի, խմբակցության անդամ Սպարտակ Սեյրանյանի և ՀՅԴ Հայաստանի Գերագույն մարմնի ներկայացուցիչ Արսեն Համբարձումյանի հսնդիպումը։

Վարչապետ Նիկոլ Փաշինյանը կարևորել է քննարկումների նոր փուլը և հույս է հայտնել, որ համատեղ քննարկումները կլինեն շարունակական․ «Արդեն քննարկումների նոր փուլն է և ուրախ եմ այս առիթի համար։ Շատ եմ կարևորում այս երկխոսությունը և ուզում եմ ասել, որ բարձր եմ գնահատում ՀՅԴ-ի գործունեությունն ու դերը մեր ժամանակակից քաղաքական կյանքում։ Հույս ունեմ, որ մեր խոսակցությունները, քաղաքական գործընթացները և քաղաքական իրավիճակը կընթանան համագործակցության շարունակության տրամաբանությամբ, և, իհարկե, մենք պատրաստ ենք անելու ամեն ինչ դրա համար։ Համոզված եմ, որ նաև ձեր ընկալումն է այդպիսին»։

Վարչապետն իր խոսքում ընդգծել է, որ խնդիրների հաղթահարման կարելի է հասնել միայն մշտական երկխոսությունների և քննարկումների միջոցով, որի հիմքում ընկած կլինի երկրի պետական և ազգային շահը․ «Մենք քաղաքական այս իրավիճակում պետք է մշտական երկխոսության մեջ լինենք, քննարկենք խնդիրները։ Ես չեմ ուզում ասել, որ մենք հույս ունենք, որ խնդիրներ չենք ունենա, դա ընդհանրապես լավ ռեժիմ չէ որևէ ժողովրդավարական երկրում, ուղղակի պետք է հուսալ, որ բոլոր խնդիրները հնարավոր կլինի քննարկել փաստարկների, երկխոսության և քաղաքական իրավիճակի հաշվառման և երկրի պետական ու ազգային շահերի, ժողովրդի շահերի տրամաբանության տեսանկյունից։ Ուրախ եմ այս հանդիպման համար և շնորհակալ եմ նաև ձեր պատրաստակամության համար»։

Արմեն Ռուստամյանն էլ, իր հերթին, հաստատել է, որ անկախ հետագա որևէ դասավորումից, Դաշնակցություն կուսակցությունը պատրաստ է համագործակցության՝ ի շահ մեր երկրի առջև կանգնած թե՛ ներքին, թե՛ արտաքին մարտահրավերների լուծման․«Դաշնակցությունն այն կուսակցությունն է, որ անկախ նրանից, թե ինչպիսի զարգացումներ տեղի կունենան ներքաղաքական առումով, մենք հստակ ունենք մեր գաղափարներն ու քաղաքական դիրքորոշումները, որոնք անփոփոխ են մնալու։ Մենք վստահ ենք, որ ի շահ մեր երկրի առջև կանգնած թե՛ ներքին, թե՛ արտաքին մարտահրավերների լուծման, անկախ հետագա որևէ դասավորումից՝ մենք միևնույն է պետք է շարունակենք միմյանց հետ համագործակցել ի շահ մեր երկրի, մեր պետության։ Այդ առումով, Դաշնակցության լիարժեք աջակցությունը միշտ եղել է և կլինի»։

ՀՅԴ խոհրդարանական խմբակցության ղեկավարը համոզված է, որ բոլոր խնդիրները կարելի է լուծել փոխադարձ հարգանքի, միմյանց տեսակետները լսելու և համադրելու արդյունքում․ «Իսկապես, շատ կարևոր է, որ այս փուլում մենք կարողանանք բոլոր խնդիրները լուծել փոխադարձ հարգանքով, միմյանց տեսակետները լսելով, համադրելով, որովհետև առողջ համագործակցությունը ենթադրում է նաև որոշակի հարցերի հետ կապված քննարկումներ, ինչու ոչ՝ բանավեճեր։ Վստահ եմ, որ արդյունքում կարող ենք հանգել ընդհանուր հայտարարի, որովհետև մեր նպատակն իսկապես նույնն է»։

Արմեն Ռուստամյանն իր խոսքում անդրադարձել է նաև մերժման փուլին, որը ենթադրում էր մերժել անցյալի բոլոր բացթողումները։ «Մենք հենց սկզբից այս նոր իրադարձություններին, հեղափոխությանը, որ տեղի ունեցավ Հայաստանում, շատ մեծ արժևորում ենք տվել և իսկապես համարում ենք, որ հեղափոխությունն ունի փուլեր, որ պետք է անցնի։ Մեզ համար մերժման փուլը նույնպես շատ կարևոր էր, որը ենթադրում էր մերժել անցյալի բոլոր բացթողումները, սխալները։ Պետք է կարողանալ վերադասավորվել և անցնել արագ կառուցման և այդտեղ մեր ամբողջական աջակցության վրա Դուք կարող եք միշտ հույս ունենալ», -եզրափակել է Ռուստամյանը։