Այսօր տեղի է ունեցել առաջին փոխվարչապետ Արարատ Միրզոյանի հերթական հանդիպումը մի շարք միջազգային դոնոր պետությունների և կազմակերպությունների ներկայացուցիչների հետ` քննարկելու արտահերթ խորհրդարանական ընտրություններին միջազգային հանրության աջակցության հետ կապված հարցերը: Հանդիպման ընթացքում քննարկվել են խորհրդարանական արտահերթ ընտրությունների անցկացման մեխանիզմներին, ժամկետներին, ՀՀ ընտրական օրենսգրքի բարեփոխմանը, սահմանադրական փոփոխություններին, ընտրությունների անցկացման համար այլ անհրաժեշտ տեխնիկական աջակցությանը վերաբերող հարցեր:

Դոնոր պետությունների և կազմակերպությունների ներկայացուցիչները վերահաստատել են իրենց աջակցությունն արտահերթ խորհրդարանական ընտրությունների անցկացման հարցում, նախանշել բոլոր այն ուղղությունները, որոնց շուրջ իրենց կողմից տարվելու են համապատասխան աշխատանքներ: Հանդիպման ընթացքում միջազգային կառույցների ներկայացուցիչները շնորհավորել են առաջին փոխվարչապետին ս.թ. սեպտեմբերի 23-ին տեղի ունեցած Երևանի ավագանու ազատ և ժողովրդավարական ընտրությունների կապակցությամբ: