ՀՖՖ արտահերթ ժողովի մասնակից 59 պատվիրակները ֆեդերացիայի նախագահի պաշտոնում միաձայն քվեարկել են Արթուր Վանեցյանի օգտին: Ընտրությանն ակնհայտորեն ամոթխածությամբ ներկա չէր ՀՖՖ արդեն նախկին նախագահ Ռուբեն Հայրապետյանը: Հիշեցնենք, որ նա ֆեդերացիան նախագահել է 2002 թվականից: Այդ տարիների ընթացքում ֆուտբոլի ազգային հավաքականի երկրպագուները, ֆուտբոլային տարբեր մասնագետներ պարբերաբար պահանջել են Ռուբեն Հայրապետյանի հրաժարականը: ՀՖՖ նախկին նախագահը ժամանակ առ ժամանակ խոստացել է հրաժարվել ֆեդերացիայի նախագահի պաշտոնից՝ ընտրելով թիրախային իրադարձություններ, բայց այդպես էլ չի լքել պաշտոնը, պատճառաբանելով, որ իրենից բացի դեռեւս չի տեսնում մեկ այլ թեկնածուի, միայն վերջերս էր մի փոքր կոտրվել՝ ի դեմս ԱԱԾ-ի պետի հնարավոր թեկնածության: Ռուբեն Հայրապետյանը ՀՖՖ 16-րդ համագումարում լրագրողներին ասել էր, որ եթե ԱԱԾ պետ Արթուր Վանեցյանը դնի իր թեկնածությունը ֆեդերացիայի նախագահի պաշտոնում, ապա ինքը չի առաջադրվի: Արթուր Վանեցյանը ՀՖՖ նախագահի պաշտոնում միակ առաջադրված թեկնածուն էր։