Երեկ ԱԺ պետաիրավական և մարդու իրավունքների պաշտպանության հարցերի մշտական հանձնաժողովի նիստում ՀՀ քրեական օրենսգրքում և կից ներկայացված օրենքի նախագծերի փաթեթում փոփոխություններ անելու առաջարկի շուրջ քննարկումը հարթ չի անցել։ Մի շարք պատգամավորներ առաջարկվող փոփոխությունների առնչությամբ իրենց մտահոգությունները նաև այսօրվա արտահերթ նիստին են բարձրաձայնել։ «Չկա մեկը, ով դեմ չէ ընտրակեղծարարություններին ու ընտրակաշառքին, բայց չի կարելի ջրից ելնել, կրակն ընկնել: Կա նպատակ՝ ընտրությունները զերծ պահել նման միջամտություններից, բայց չի կարելի դա անել ավելի կարևոր շահեր ոտնահարելու հաշվին: Մարդուն տանել 3 տարի ազատազրկել՝ ինչ է թե խոստացել է մեկին կողմ քվեարկել, հակասում է քրեական իրավունքի գիտությանը: Վերջինս թույլ չի տալիս մարդկանց պատասխանատվության ենթարկել իրենց մտքերի ու մտադրությունների համար: Խոստումը հավասարեցված է կաշառք տալուն, այստեղ խախտված է արարքի նկատմամբ համարժեք մոտեցում ցուցաբերելու սկզբունքը», -ասաց «Ծառուկյան» խմբակցության պատգամավոր Գևորգ Պետրոսյանը և գլխավոր զեկուցող, արդարադատության փոխնախարար Արթուր Հովհաննիսյանից հետաքրքվեց՝ երեկվա քննարկումից հետո փոփոխվել է, արդյոք, տեքստը, թե ոչ։

Փոխնախարարը հստակեցրեց՝ պայմանավորվել էին, որ առաջին ընթերցման ժամանակ տեքստը սկզբնական տարբերակով կներկայացվի, իսկ առաջին ընթերցումից երկրորդ ընթերցում ընկած ժամանակահատվածում կառավարությունը որոշ փոփոխություններ կանի։

ՀՀ պետաիրավական հարցերի մշտական հանձնաժողովի նախագահ Գևորգ Կոստանյանն էլ, կիսելով Պետրոսյանի մտահոգությունը, հավելեց՝ հանձնաժողովը դրական եզրակացություն է տվել նախագծին՝ քաղաքական նկատառումներից ելնելով։ «Այս նախագծում իրավական այնպիսի խնդիրներ կան, որ նախագիծն ընդունելը վտանգ է իր մեջ պարունակում։ Հետևաբար, մենք պայմանավորվեցինք կառավարության հետ՝ նկատի ունենալով, որ կառավարությունն արտահերթ նիստ հրավիրել է հենց այս հարցի կապակցությամբ, որպեսզի արտահերթ նիստը չտապալվի, մենք քաղաքական նկատառումներից ելնելով դրական եզրակացություն տվեցինք հանձնաժողովում՝ պայմանով, որ պետք է իրավական էական շտկումներ լինեն, և միայն այդ դեպքում կհամարենք, որ մենք ունենք իրավական օրենք, որը միտված կլինի մեր ընտրական գործընթացը բարելավելու և վստահություն ձեռք բերելու ընտրական գործընթացի նկատմամբ», -նշեց Կոստանյանը։

Հիշեցնենք, որ քննարկման ներկայացված փաթեթով կառավարությունն առաջարկում է քրեական պատասխանատվություն սահմանել ընտրակեղծարարության մի շարք դրսևորումների դեպքում, մասնավորապես՝ քրեական պատասխանատվության ենթարկվել բոլոր նրանց, ովքեր ընտրությունների ընթացքում ընտրակաշառք կտան կամ կվերցնեն։ Բոլոր այն ուժերը կամ կուսակցություններն ու անհատները, որոնք նախընտրական շրջանում բարեգործության անվան տակ ընտրողներին նյութական կամ դրամական օգնություն կբաժանեն, դարձյալ պատասխանատվության կկանչվեն: