Քաղաքապետի թեկնածու Հայկ Մարությանի երեկվա բոցաշունչ ելույթը խոսելու և արտահայտվելու, ինչու չէ, տեղ-տեղ «կծելու» հրաշալի առիթ ընձեռեց ոչ միայն ՀՀԿ դեմքերին, այլ նաև ԲՀԿ ակտիվ պատգամավորներին, որ «մեծահոգաբար» շտապեցին Մարությանին «բացատրել» թույլ տված կոպիտ սխալի հետևանքները։ Ու եթե Նաիրա Զոհրաբյանի և Պետրոս Ղազարյանի մեկնաբանությունները որոշակի «ներողամտություն» էին պարունակում, ապա Գևորգ Պետրոսյանը, իրեն հատուկ «երեսին ասելու» մշտական ոճով քննադատեց Մարությանի սևերի և սպիտակների մասին ելույթը՝ այն որակելով ինքնախայտառակման առիթ։ Պատգամավորը Facebook-յան իր էջում մասնավորապես գրել է․«Պարզվում է՝ ընտրությունները ոմանց համար ինքնադրսևորման, ոմանց համար՝ ինքնահաստատման, ոմանց համար էլ ինքնախայտառակման և ինքնաոչնչացման առիթ են․․․
Եվ ահա, ամենավերջին առիթից օգտվելու գայթակղությանը հենց առաջին քայլից չդիմադրեց իրեն ամենաառաջինը համարող թեկնածու Հայկ Մարությանը․․․
Նա անգրագետ մարդ չէ, որ չիմանար, որ ոգևորությունից խայտառակություն կես քայլ է, և նա կատարեց իր Քայլը․․․
Անկեղծ ասած չեմ ուզում հավատալ, որ նրա այդ Քայլը ողջունել է նրան «քայլելու դուրս բերած» իր առաջնորդը՝ Փաշինյանը, ով միշտ էլ իրավամբ դեմ է եղել «մեր դեմ խաղ չկա» կարգախոսին․․․
Այո, Հայկոն ճիշտ է, իրենց դեմ խաղ չկա, քանի որ իրենց մրցակիցները բնավ էլ խաղեր տալու նպատակով չեն մասնակցում ընտրապայքարին․․․
Հայկոյին թվում է, թե Երևանի ղեկավարումը խաղ է, այն էլ՝ բեմական, այն էլ՝ կոմիկ․․․
Այդպես չէ, եղբայր, դուրս արի քո ամենօրյա դերից․․․Եվ հետո, ինձ մի հարց է հետաքրքրում․ԱԱԾ-ն կարգին զբաղվում է՞ կարգին Հայկոյով․․․
Ինչո՞ւ․ասեմ․․․
Ընդամենը մի քանի օր առաջ ՀՀ վարչապետը հրապարակում հրապարակավ գուժեց, որ ԱԱԾ-ն զբաղվելու է նրանցով, ովքեր սպառնալու են քաղաքացիական պատերազմի վտանգով․․․
Ժողովրդին սևի ու սպիտակի բաժանելն ուրիշ ինչ է, եթե ոչ քաղաքացիական հակամարտության սերմնացան․․․
Մի՞թե Հայկոն արդեն այնքան է հզորացել, որ իր (և իր յուրայինների) դեմ խաղ չունի նաև երկրի վարչապետը․․․
Եվ հետո, իրենց ճամբարում, հավանաբար, նաև կլինեն Հայկոյից դժգոհներ, քանզի սևից հեռու, բայց սպիտակին մոտ էլի հարազատ գույն կար, որը չի հիշատակվել կարգին Հայկոյի անկարգ ելույթում․․․»։

Հ.Գ. Հարկադրված ենք կրկնել, որ facebook-յան գրառումներում խմբագրական ոչ մի միջնորդություն չենք անում: